她(七)

是我媽媽

52.她：「今天電視播咗訪問教師嘅片段。」

我：「講咩架？」

她：「訪問咗一啲女教師，佢哋話男教師著格仔恤衫係最老套嘅！」

我：「……」

她：「唉！你點解咁無品味，你嗰件綠色嘅外套著咗咁多年，舊到呢，重唔捨得丟呀？重有格仔褸，唉，老套到呢！你著返工，唔怕人哋笑你咩？……你睇吓你啲恤衫……你啲西褲……你下次去買衫，要同阿妹一齊去，等佢幫你揀！呢啲錢唔慳得架！」

我：「……」

其實，七年前我第一天上班，穿著的就是她買給我的格子恤衫！

53.很小很小的時候，買了新鞋回來，雙腳卻總是很受罪，被新鞋弄得遍體鱗傷。

後來她教我：「你買咗新鞋返嚟，要咬佢一啖，你咬咗佢之後，鞋就唔會咬你啦。」

於是，我便拿起新買的黑皮鞋，有點不情願地每邊咬了一口……

不過，之後穿這雙鞋子的確沒有再痛過。

54.姨母從泰國帶來很多當地特產，其中包括八個很小的粽型甜點。

她：「你哋食唔食？」

我：「啱啱食咗飯，而家食唔落啦。」

她：「……」

於是她開始吃，一個又一個地吃，吃了八個糯米小吃，面不紅，氣不喘……

55.她：「你有機會去新墟，買嗰啲糯米飯……包住肉鬆嘅…...糯米飯返嚟畀我食。」

妹：「咩嚟架？」

她：「包住肉鬆嘅….外面係糯米飯……」

妹：「……喺邊道買呀？」

她：「喺新墟……我們曾經喺嗰道買過手袋架呢！」

妹：「邊道呀？」

她：「咪就係買手袋嗰道囉。」

最後，她畫了地圖，才知道她要買的原來是豆漿大王的餈飯！

56.妹買了芝士鍋餅回家。

妹：「呢兩個鍋餅，聽日我帶返學校做早餐啦。」

她：「你唔係買嚟畀我食架咩？」

妹：「……係……」

她便都立即吃了！一個不漏！

57.她：「今日喺地鐵上見到個菲傭，點知佢對腳同你一樣……」

我：「同我一樣？」

她：「一樣咁多腳毛！」

我：「......」

58.妹：「你聞一聞我啲頭髮有無臭味！」

她：「黐線，做咩要人聞你啲頭髮呀，唔聞！」

妹：「嚟啦……聞一聞之嘛。」

她：「做咩要人聞你啲頭髮啫？」

妹：「如果頭髮無臭味，我今晚就唔洗頭啦，懶嘛！」

她：「黐線，你洗唔洗頭自己決定，做咩要人聞你啲頭髮？」

過了一會……

妹：「……聞一聞啦！」

她隨便嗅了一嗅：「好臭呀，快啲去洗頭！」

59.她：「你尋晚做咩咁早就瞓啦？」

我：「頭有啲痛。」

她：「瞓咗幾耐？」

我：「都有八、九個鐘。」

她：「……真貪心！」

我：「……」

60.她：「幫我去超級市場買一包切皮嘅麥方包，得唔得？」

我：「得。不過，個包裝係點架？」

她：「格仔嘅、五、六片裝。你去到睇吓就會搵到架啦。」

我：「如果賣完呢？」

她：「點會呢！大把啦！」

我：「……」

到超市後，我發現麥包真的賣光了！於是給她電話。

我：「麵包賣晒啦……」

她：「算啦！我聽日自己買。」

(覺得她一來覺得我不認得要買哪款麵包；二來無法認同麵包會賣光！

翌日。

她：「麵包果然賣晒呀，點會咁受歡迎呀？」

我覺得她似在道歉……