她(三)
是我媽媽
19. 她：「記得我生你妹妹嗰陣，唔知點解，好喜歡買玫瑰花。」
我：「有啲咁嘅影響架咩？咁生我嗰時呢？」
她：「呵呵呵……生你嗰時，我鍾意榴槤！」
我：......
20. 她說：「你記唔記得呀？你好細個時，有一次我哋買咗部新電視，你阿爸叫你校大聲啲，你就立刻喺木板床上跳落嚟──係呀，你以前無床瞓，每晚都喺枱同櫃嘅櫃桶中間擺塊木板畀你瞓──你走到電視機前面，將電視個聲推到最高，哈哈哈，我們當時住喺人哋屋企一間房咋，一下子咁大的聲音轟出嚟，嚇到我哋都唔識反應，哈哈哈！」
21. 我問：「點解啲叉燒咁肥既？」
她答：「肥都好味架。」
我話：「碟雞得骨冇肉嘅？」
她說：「食咁多肉，好肥架！」
第二天，回到學校，打開飯盒，鋪滿了瘦叉燒和雞肉。
22. 她說：「你換身分證時，要笑好啲。」
我答：「就係同平時一樣。」
她說：「你平時就係笑得好『肉酸』。」*
*從小開始，她都不欣賞我的笑容，認為我不會笑！
23. 她指著電視機上的馬英九問：「你知唔知佢點解改呢個名呀？」
我答：「唔知。」
她解釋：「你知唔知佢喺香港出世架？」我搖頭。「他出世時住喺九龍，所以個名有個『九』字；他出世時香港重係英國統治嘅，所以用咗個『英』字。佢屋企人就叫佢『馬英九』啦。」
我問：「你點知架？」
她指了指電視機：「電視節目講嘅。」
……
過了一會兒，她說：「我作架咋，哈哈哈！」
24. 她問：「得唔得閒呀？」
我答：「得。」
她：「上次你哋買畀我個手袋太大啦，我唔係已經將個尺寸話咗畀你哋知咩？點解買到咁大個嘅？又係皮嘅，二百幾蚊，哼，平時用又唔方便。我已經將個手袋送咗畀內地啲親戚啦。而家我哋出去買返個，你同阿妹一人出一半錢啦。你哋都唔知我想要咩尺寸款式。」
我：「哦......」
在百貨公司。
我：「呢個好唔好呀？」
她掛在身上：「唔……個款咁老套……。」
我：「呢個呢？」
她：「太貴啦！二百幾蚊呀！」
百貨公司的貨品陳列是這樣的，一個比一個貴。我問的第一個其實是最便宜的，因為知道媽媽想買一個比較常用的。第二個是二百多元，第三個……
我：「不如呢個啦？」
她：「呢個……靚係靚……不過太大啦。」
我：「咁呢個啦，都唔錯呀！」
「嘩！」她掛在身上，很滿意地笑了。「係呢個款式啦，我想要嘅咪就係呢個款囉。幾多錢呀？」
我：「五百幾，八五折。」
她：「即係幾多錢呀？」
我：「四百幾啦！」
她：「嘩，太貴啦，走走走…..」
於是我們從頭再看一次，將之前看過的手袋再看一次，又再一次放下。最後……她將最後那個手袋拿在手裏。
我：「就買呢個啦，呢個款式最好架啦，而且質地幾好呀。」
她：「唔啦……太貴啦。」
我：「都唔會呀，我同阿妹夾呀嘛，每人都係二百蚊多啲。」
她：「哼，你以為賺錢好容易咩？……(下省三分鐘內容)」
店員走過來：「呢個係最後一個啦，而且好實用，你睇裏面啲格數好多……你要嘅，計你平啲啦。」
她：「平幾多呀？」
店員：「就計你八折啦！」
……
回到家裏，她將自製的水晶吊飾掛在手袋上，從房間走出來。
她問我：「靚唔靚呀？」
我答：「我覺得可以吊高一點。」
她別過臉，答：「好靚啦！」
於是她很滿意地走回房間。
......
過了兩天，媽拿了另一個手袋從房間走出來。
她問：「靚唔靚呀？」
我問：「前兩日買嗰個點解唔用呀？又買個新嘅？」
她：「嗰個太貴了！呢個先六十幾蚊，平時用就最啱啦。」
我：「……」
