她 (四)
是我媽媽
25. 昨天的她說：「我煮咗你鍾意食嘅辣菜……好唔好味？唔夠嘅話廚房重有……呢碟好似唔夠味，一陣再加一加……聽日使唔使帶飯返學校？帶呢個餸啦！……」
今天的她說：「早就叫咗你啦，明知自己腸胃唔好，就唔好成日食辣嘢啦……食嘅話又唔節制……」
我：「……」
26. 她：「你摸吓我隻腳……你睇滑唔滑溜？」
我：「滑。」(識佢咁耐，第一次摸佢隻腳；而且真係滑！)
她：「唉……」
我：「滑咪好囉，做乜唉聲嘆氣呢？」
她：「如果呢啲皮膚換上塊面就好啦。」
我：「……」
27. 她：「以後如果我問你『好唔好』、『要唔要』、『得唔得』之類嘅問題，假如你要答我『唔好』、『唔要』、『唔得』嘅話，你就答『NO』，因為我成日聽唔到你答『唔』。明唔明？」
我：「YES。」
28. 她說：「炒菜其實好簡單。加少少糖，少少鹽，用猛火炒，再蓋上蓋，焗一陣。最後加少少魚露，試一試味，唔夠就再加……咪炒好囉！好簡單，係咪？」
我：「……係。」
29. 電視上新聞報道正播放以巴戰亂的片段。
妹問：「做乜咁多血嘅？」
她答：「因為有人流血囉。」
……
她又說：「嘩！……你睇，樹上幾多水果！」
妹回應：「呢單係戰亂新聞，你就睇後面啲水果？」
她說：「個電視畫面咁大，要睇得闊啲架嘛！」
30. 昨晚。
我：「做乜你鼻上面生咗兩粒暗瘡嘅？」
她：「……」走開了。
今晚。
她：「你鼻上面嗰啲咩嚟架？」
她：「無咩呀。」
她：「點解頸上面都有嘅？......你被啲油焫親呀？」
她：「無事嘅。」
我：「……」
男孩子，總是太粗心。
31. 妹：「尋日我食咗燕窩月餅。」
我：「係咪將燕窩碎灑喺月餅上面？」
妹：「唔係，係冰皮嘅，喺月餅裏面。」
我：「味道OK？」
妹：「其實無咩味。」
她開腔了：「咪就係，燕窩係燕子嘅口水，當然無味啦。你哋吞口水有味咩！」
妹和我：「……」
32. 她和一位嬸嬸在聊。
她：「你好似有個女，我應該見過一次。」
嬸嬸：「係呀。」
她向我和妹說：「嬸嬸個女生得好靚架！」
嬸嬸：「邊道係呀。」看得見嬸嬸滿心歡喜。
不過，她接著說：「嬸嬸個女生得好似佢老豆，所以越大越靚……」
妹和我：「……」
