我不知應該講咩好……媽呀，我好亂呀！

最近有機會去大學上一啲課堂，講師落力講解，都預咗座上嘅學生，問咗唔會應，不過唔應不特止，頭都唔抬起，全班大部份人都keep 住低頭；有眼神交流，會回應嘅，反而好似異類咁。

不過我想講嘅其實唔係呢樣，而係，我同啲學生傾偈，好辛苦撬開佢哋把口啦，原來佢講普通話。咁我咪用普通話應佢囉。到另一個，又係講普通話？搞到我去到第三輪時，自己唔知黐咗咩線，一開口就同個學生講普通話，點知，呢個學生係講廣東話嘅！

媽呀，我好亂！

究竟係而家啲本地大學生唔多出聲，於是班講普通話嘅學生成為比較好發言嘅一群；定係，講普通話嘅學生，多得咁緊要？因為我喺大學行去課室嘅途中，真係聽到好鬼多人講普通話。唔單只學生，貌似教職員嘅人都係！

除咗大學，唔好講去主題公園，就算係去行一般商場，啲sales 見到我行埋去，都好殷勤咁笑住同我：「歡迎你。❨普通話❩」又或者去啲大型連鎖店，啲sales 見一大班人入舖，都會好大聲咁用普通話嗌：「歡迎光臨！」我都明內地客豪爽啲，只不過……

媽呀，我好亂！

今朝見到個細路跌咗嘢落地下，我望一望佢，唔知點解第一個反應係，我諗吓自己喺邊，之後從佢嘅衣著打扮估吓佢係香港仔定內地人。由於佢跌咗嘢，電光火石間，我衝口而出：「丟啦！(係，係普通話)」點知個細路聽到唔應我，就執返地吓啲嘢。正當我心中想爆佢唔該都無聲嘅時候，個細路就同佢身邊嘅朋友講廣東話！！！

「丢！」(廣東話)

其實我無嘢㗎，我明好人壞人不分地域，我明我哋一直被溝淡緊，我明……係我自己問題，是我思想混亂，是我自己唔清醒……媽呀，我好亂！